Кошаркарките на Баскет Кам стигнаа до нов историски успех, откако во финалето од Купот на Македонија славеа над Крива Паланка со 74-68 и го подигнаа четвртиот трофеј во ова натпреварување.
На 34. издание од завршниот турнир „Благоја Георгиевски-Буштур“, одигран во салата „Кирил и Методиј“ во Македонска Каменица, домаќинот уште од стартот покажа дека е решен да го одбрани домашниот терен. Со цврста одбрана и сигурен напад, Баскет Кам по првите десет минути имаше двоцифрена предност (17-7), поставувајќи го темпото кое го контролираше речиси во текот на сите 40 минути.
Во втората четвртина разликата дополнително порасна, па тимот од Македонска Каменица во еден момент водеше и со 21 поен разлика. Одличната шутерска вечер, особено од линијата за три поени, им донесе комотна предност на домаќинките, кои на полувреме заминаа со сигурни 42-27.
Сепак, Крива Паланка не се предаде. Во второто полувреме ривалот постепено ја намалуваше негативата, а на стартот од последната четвртина успеа да се доближи и на минус шест поени. Во тие моменти Баскет Кам остана и без Ивана Кметовска поради пет лични грешки, но капитенот Поп-Димитровска со важна тројка во финишот ја врати контролата и ја обезбеди победата.
Најефикасна во победничкиот состав беше македонската репрезентативка Ивана Кметовска со 24 поени (и значаен придонес во скокот), додека Димова и Поп-Димитровска постигнаа по 16 поени, а Адамовска додаде 12. Кај Крива Паланка се истакна Робинсон со 30 поени, поддржана од Ниехуес и Грин.
Со овој триумф, Баскет Кам ја освои четвртата куп-титула во последните шест сезони и уште еднаш потврди дека е еден од најдоминантните тимови во македонската женска кошарка.
