ТАБЕЛА: Охрид и Шкендија Арачиново се одвоија, Скопје ја стигна Брегалница, Тетекс сигурен во баражот!

Со вчерашните мечеви од 16. коло беше отворен пролетниот дел во Втората македонска фудбалска лига, а првото пролетно коло направи минимални промени на табелата, но некои екипи се зацврстија на своите позиции.

Охрид го доби дербито со Беласица со 0:1 и на тој начин сега е на врвот со 39 бодови, а пак Шкендија Арачиново која славеше над Преспа со 4:1 е втора на табелата со 38 бодови. Овие две екипи се одвоија во однос на конкурентите.

Брегалница останува на третата позиција со 33 бодови, но поразот во Гевгелија од Кожуф му овозможи на Скопје кој ја доби убедливо Слога во Виница да дојде на бод негатива, бидејќи „пиратите“ од Автокоманда сега се на четвртото место со 32 бодови, а во случајот ја поминаа Беласица која се спушта на петтото место со 31 бод.

Новаци лесно ја отвори пролетната полусезона со убедлив триумф над Победа и останува на шестото место со 30 бодови, Детонит Плачковица беше убедлив над Големо Коњари и со тоа е седми со 29 бодови, а пак Осогово останува осми со 27 бодови откако ја доби Саса во финишот со 1:0.

Кожуф имаше важна победа над Брегалница, трите бодови се добредојдено за тимот од Гевгелија кој иако останува деветти односно во бараж зоната со 25 бодови прави сериозен чекор напред кон директен опстанок.

Тетекс го доби Вардар Неготино е се зацврсти во бараж зоната како десетти со 20 бодови, а пак Каменица Саса е на 11. место со 17 бодови или во бараж зоната.

Во зоната за директно испаѓање нема проблеми и натаму Вардар Неготино е на 12-тото место со 12 бодови, Победа е место подолу со 11 бодови, Преспа е на 14-тата позиција со девет бодови, Слога Виница е претпоследна со седум бодови, на дното е Големо Коњари со три бодови.