ЖФК Истатов 2015 донесе одлука дресот со број 4 трајно да биде повлечен од употреба, во чест на Катерина Петкова – фудбалерката која со години беше еден од заштитните знаци на клубот. Бројот што таа го носеше нема повеќе да биде во функција и ќе остане симбол на нејзиниот придонес во синиот дрес.
Петкова ги направи своите први фудбалски чекори токму во Истатов. Низ годините се изгради во стандарден и посветен член на екипата, прераснувајќи во една од најпрепознатливите фудбалерки на клубот.
Нејзините настапи и развој во матичниот клуб ѝ донесоа и репрезентативен статус, а на 19 години го реализираше и својот прв интернационален трансфер.
“Како знак на благодарност и почит кон сето онаа што Катерина Петкова го даде за клубот, ЖФК Истатов реши дресот со број 4 да го повлече и нема повеќе да биде во функција, туку засекогаш ќе биде дресот со кој нашата Кате го одигра последниот натпревар во него. Легендите го заслужуваат тоа”, истакнаа од ЖФК Истатов.
Кариерата ја продолжува во српскиот шампион Спартак Суботица, што претставува значаен чекор напред во нејзиниот професионален пат.
Со повлекувањето на дресот со број 4, ЖФК Истатов ја заокружува една успешна етапа и оддава трајна почит кон фудбалерката која остави силен печат во клубската историја.
