На денешната седница, Управниот одбор на Фудбалската федерација на Македонија донесе повеќе значајни одлуки поврзани со функционирањето на фудбалскиот систем, натпреварувањата и развојот на инфраструктурата.
Поради грубо прекршување на одредбите од Статутот, ОФС Кичево доби суспензија во времетраење од две години. Во овој период, на сојузот му мируваат членските права, вклучително и правото на учество на делегати на Собранието на ФФМ. Сепак, клубовите од овој регион нема да трпат спортски последици и ќе продолжат да се натпреваруваат во истиот ранг и во тековната сезона и во сезоната 2026/27, согласно остварениот пласман. Фудбалските судии и контролори од ОФС Кичево ќе продолжат редовно да ги извршуваат своите обврски, додека регистрационите активности за клубовите и играчите привремено ќе ги спроведува ОФС Гостивар.
Управниот одбор одлучи редовното Генерално собрание на ФФМ да се одржи на 21 март 2026 година во хотел „Хилтон“ во Скопје, со почеток во 11:00 часот.
Со цел промоција на женскиот фудбал, донесена е одлука за бесплатен влез на сите шест натпревари од УЕФА квалификацискиот турнир за девојки до 17 години, кој ќе се одржи во Струмица и Турново од 28 февруари до 6 март. Бесплатен влез ќе има и за квалификацискиот натпревар на женската А репрезентација помеѓу Македонија и Андора, закажан за 7 март во Битола.
ФФМ испрати и јасна порака до клубовите и фудбалерите дека договорите за професионално играње мора задолжително да се доставуваат на верификација во Федерацијата. Договорите склучени надвор од официјалната постапка, познати како „двојни договори“, нема да бидат признаени и нема да имаат правно дејство во рамките на системот. За оваа појава ќе биде информирана и ФИФА.
Во кадровските промени, Светозар Станковски е именуван за нов претседател на Комисијата за натпреварување, на местото на Васко Дојчиновски, на кого му беше изразена благодарност за досегашниот ангажман.
Дополнително, ФФМ донесе одлука за набавка на 15.000 до 20.000 нови столчиња за стадионите низ државата. Распределбата ќе се врши во соработка со општинските фудбалски сојузи и ќе ги опфати клубовите од Првата, Втората и Третата лига каде што постојат услови за нивна монтажа. Со оваа иницијатива, Федерацијата продолжува да инвестира во подобрување на инфраструктурата и условите за развој на фудбалот во Македонија.
