Во организација на Фудбалската федерација на Македонија, во четврток со почеток од 14:00 часот во хотел „Хилтон“ во Скопје ќе се одржи свеченото доделување на ФИФА значките за македонските интернационални судии за 2026 година.
Настанот ќе го отвори претседателот на ФФМ, Масар Омерагиќ, а на негова покана во Скопје ќе престојува и шефот на судии на УЕФА, Роберто Росети. Росети, кој воедно е и одговорен за делегирање судии во рамки на УЕФА, ќе одржи стручно предавање пред македонските арбитри.
Свое обраќање ќе има и претседателот на Судискиот одбор при ФФМ, Емил Божиновски, додека на семинарот се очекува учество на повеќе од 70 судии од целата држава.
Ова ќе биде прва официјална посета на шеф на судии на УЕФА на Македонија, што претставува значајно признание за работата на ФФМ и нејзината соработка со европските фудбалски институции.
„Ова е значаен момент за македонското судење. Присуството на Роберто Росети и можноста за директна комуникација со највисокото ниво на европското судење претставуваат голема шанса за нашите арбитри. Убеден сум дека ваквите настани ќе придонесат за дополнителна професионализација, поголема одговорност и уште посилна меѓународна афирмација на македонските судии“, изјави Јосип Бартон, комесар за делегирање судии при ФФМ.
