Пелистер со убедливи 4-1 против Работнички го отвори пролетниот дел од сезоната во Првата лига и најави амбициозен настап во продолжението од шампионатот. Битолчани прикажаа ефикасна и организирана игра, а стартот им носи дополнителна самодоверба пред новиот предизвик кој следува веќе утре.
Шефот на стручниот штаб Милан Стојаноски во изјава за Спортска Мрежа истакна дека триумфот радува, но потенцираше дека тимот има простор за напредок.
„Задоволни сме од резултатот, има некои работи што треба да се коригираат во играта, но се надеваме дека како времето поминува, така ќе изгледаме се подобри и подобро“, изјави Милан Стојаноски за Спортска Мрежа.
Пелистер нема многу време за славје, бидејќи веќе утре го очекува гостување кај Башкими во Куманово. Тренерот предупредува дека ривалот заслужува респект, но верува во квалитетот и моменталната атмосфера во својот тим.
„Башкими е добра екипа, има позитивен резултат од Кратово во првото пролетно коло. После победата над Работнички во нашата екипа владее позитивна атмосфера, екипата е максимално спремна и мотивирана и се надеваме на позитивен резултат“, дополни Стојановски.
Натпреварот меѓу Башкими и Пелистер се игра утре со почеток од 14 часот, а битолчани ќе се обидат да ја продолжат победничката низа и да го потврдат одличниот старт во пролетниот дел.
