Ракометната федерација на Македонија продолжува со својата мисија за популаризација на ракометот меѓу најмладите, а следната станица на Ракометниот караван е Богданци. Под мотото „Ракомет – нашата игра, нашиот свет“, на 21 февруари 2026 година (петок), во спортската сала „Млаз“, од 13:00 до 15:00 часот, дечињата ќе имаат можност да бидат дел од вистински ракометен празник. Влезот е слободен.
Караванот носи игра, насмевки и дружење, а специјални гости во Богданци ќе бидат поранешните македонски репрезентативци Лилјана Новоселска и Ристо Узунчев, како и актуелната сениорска репрезентативка Марија Гугуљанова.
Лилјана Новоселска, поранешна ракометарка на ЖРК „Млаз“ Богданци и член на сениорската репрезентација на Македонија, во моментов е активен тренер во ЖРК Југ Гевгелија, каде работи со млади категории и е посветена на развојот на младите ракометни таленти.
Ристо Узунчев е поранешен репрезентативец со богата кариера во клубови како Вардар, Младост Богданци и Борец Велес, со освоени титули во македонското првенство. Денес е тренер, а неговото спортско наследство го продолжуваат и синовите Димитар и Тодор Узунчеви, млади репрезентативци на Македонија.
Марија Гугуљанова е ракометарка која се издвојува со својата борбеност, прецизност и дисциплина. Поранешна кадетска и младинска репрезентативка, таа денес е дел од сениорската репрезентација на Македонија.
Од РФМ упатија порака: „Дечиња, пристигнуваме во Богданци!“ – со покана сите љубители на ракометот да дојдат, да играат и да се дружат со своите идоли. Богданци ќе биде новата станица каде ракометот повторно ќе ја обедини младината околу спортот и позитивната енергија.
