Брера Струмица освои огромни три бода на жешкото гостување кај Арсими 1973, славејќи со 0-2 во рамки на 18. коло од Првата македонска фудбалска лига. Струмичани одиграа дисциплиниран и тактички зрел натпревар, а казната за домашните стигна во клучните моменти од двете полувремиња.
По внимателен почеток со многу борба на средината од теренот, гостите го зададоа првиот удар во 23. минута. Леонардо Петровиќ проби по левата страна, влезе во казнениот простор и со прецизен удар го совлада Иљази за 0-1 и голема радост кај струмичани.
Во продолжението Арсими се обиде да возврати. Домаќините ја презедоа иницијативата, создадоа неколку опасни ситуации, ја погодија и стативата, а најзрелата шанса ја имаше Ремзифаик Селмани кој од непосредна близина со глава не успеа да го израмни резултатот. Се заканија и Цуцули и Јусуфу, но одбраната на Брера издржа под притисокот.
Струмичани, пак, чекаа своја можност од контранапад. Тодоров во вториот дел пропушти одлична прилика да ја удвои предноста, но потврдата за победата стигна во судиското продолжение. Во 90+3 минута, по брз противнапад, Стојанов со прецизен удар ги постави конечните 0-2.
Со оваа шеста победа сезонава Брера дојде до 23 бода и направи значаен исчекор во борбата за опстанок, додека Арсими го запиша вториот пораз во пролетниот дел и остана на 22 бода, дополнително комплицирајќи ја својата позиција на табелата.
