Пелистер го заокружи преодниот рок со ангажман на млад и перспективен фудбалер од Србија. Ново име во зелено-белиот табор е 20-годишниот офанзивен играч за врска Михајло Петровиќ, кој доаѓа на позајмица од ОФК Београд до крајот на сезоната.
Петровиќ важи за фудбалер со сериозен развоен пат. Тој е производ на младинската школа на Партизан, каде што ги мина сите возрасни категории, а стигна и до сениорскиот состав. Во досегашниот тек од кариерата запиша настапи во српската Суперлига, а во есенскиот дел од сезоната беше дел од тимот на ОФК Београд.
Станува збор за креативен играч од средниот ред, кој природно делува зад напаѓачите, но може да одговори и на позицијата лево крило. Воедно, зад себе има настапи за младинските селекции на Србија до 18 и до 19 години, што дополнително ја потврдува неговата перспектива.
Трансферот е реализиран на иницијатива на тренерот Милан Стојановски, кој добро го познава Петровиќ од заедничкиот период во Телеоптик и верува дека младиот фудбалер ќе донесе свежина и поголема конкуренција во средниот ред.
Петровиќ веќе е во Битола и ќе му се стави на располагање на стручниот штаб во продолжението од сезоната во Првата македонска фудбалска лига, со цел да помогне во остварувањето на амбициите на Пелистер.
