Лидерот на домашниот шампионат, тимот на Вардар денеска во рамките од 24. коло на стадионот во Гостивар, од 14:30 часот ќе се соочи со домашната екипа на Арсими.
Меч во кој Вардар е апсолутен фаворит, но тоа во пракса особено сезонава не треба да значи ништо. Арсими на пример во ноември и одржа лекција на Шкендија во победата од 3:0, токму на овој терен па нормално дека претпазливоста треба да е на највисоко можно ниво.
По оној шокантен период во кој испадна во Купот на Македонија од Охрид, па одигра нерешено со Струга ТЛ и финишираше со домашен пораз од Шкендија, Вардар потоа нанижа две победи по ред.
Против Силекс на гости и против тимот на АП Брера на Арената Тодор Проески во Скопје. И обата дуела се добиени со минимални 0:1, односно 1:0.
Вардар денеска нема да настапи комплетен, има неколку од стандардните играчи кои што нема да настапат, но од „црвено – црниот“ табор се водат со тезата дека тоа не смее да биде алиби за евентуален слаб резултат. Напротив, Вардар во моментов има доволно квалитетен играчки ростер за да може да се потпре и на оние кои стрпливо чекаат шанса на клупата за резервни играчи.
