ГРК Охрид направи огромен чекор кон четвртфиналето на ЕХФ Европскиот Куп, откако во „Билјанини Извори“ убедливо ја совлада Дукла Прага со 30-21 и обезбеди високи плус девет пред реваншот во Прага.
Охриѓани одиграа зрело, трпеливо и доминантно во текот на целиот натпревар. Од самиот старт ја наметнаа својата игра, поведоа со 6-0 и ја диктираа динамиката, додека блескавата форма на Пилиповиќ беше дополнителна сигурност меѓу стативите. И покрај повредата на Лиапис во раната фаза, домашниот состав не дозволи пад во играта, а во второто полувреме разликата достигна и максимални +13, пред гостите само минимално да ја ублажат негативата за конечни 30-21.
По убедливата победа и контролата во текот на најголемиот дел од натпреварот, одбранбениот столб во редовите на Охрид, Ориол Реј Моралес, во изјава за Спортска Мрежа, истакна дека тимот одиграл квалитетен меч, но дека сепак чувството на крај е дека можеле и подобро. Тој потенцираше дека разликата можела да биде и повисока, но изрази уверување дека и сегашната предност е сериозна основа за пласман во следната фаза.
,,Мислам дека одигравме солиден натпревар, иако впечатокот на крај е дека можевме и подобро. На десетина минути пред крај имавме и над десет голови разлика, на крај се девет, но сметам дека и тоа може да биде доволно за нас да поминеме во следната рунда.”- изјави Моралес за Спортска Мрежа.
Со убедливата победа и висока предност пред реваншот, Охрид испрати јасна порака дека сериозно чекори кон европската елита. Тимот покажа квалитет, карактер и тактичка зрелост, а доколку ја повтори истата дисциплина и во Прага, европскиот сон за пласман меѓу најдобрите осум ќе стане реалност.
Останува уште еден чекор – но со ваква игра и самодоверба, охриѓани имаат силен аргумент во своја корист пред реваншот.
