Искусниот Виктор Велкоски го засилува прволигашот Брера Струмица, дознава ексклузивно Спортска Мрежа, трансфер кој клубот од Струмица треба формално да го потврди, бидејќи според нашите информации двете страни се во финални преговори и ќе следува потпис за соработка до крајот на сезоната.
Искусниот дефанзивец во Брера доаѓа од редовите на Работнички и своето деби може да го вика веќе во првата пролетна рунда односно во четврток против Македонија ЃП.
Струмичани сега добиваат на искуство на одбранбената линија во битката за потврда на директен опстанок во Првата лига.
Велкоски низ кариерата покрај за Работнички настапуваше за Вардар од каде ја започна кариерата, а низ која беше дел од Пелистер, Љубанци, Скопје, Победа и Брегалница, додека пак во странство настапуваше за Лачи во Албанија, меѓународна кариерата градеше во Грција за екипата на Егиниакос, а беше дел и од казахстанскиот Туран.
Според информациите на Спортска Мрежа за искусниот Виктор Велкоски понуди пристигнале и од Израел и Ирак, но сепак тој се одлучил да ја прифати понудата на Брера Струмица и да остане во македонскиот фудбал.
