Овој викенд започнува плеј-офот во Првата кошаркарска лига на Македонија каде ќе се води битка низ спортските сала во Македонија за влез во Суперлигата.
Охрид овој сегмент го стартува на домашен терен против Соколи од Штип, меч кој има голем влог во битката на охриѓани да се вратат во кошаркарската елита на Македонија.
Клубот бара силна поддршка и полна сала со цел да стигне до триумф против штипскиот тим и со победа ја стартува плеј-оф фазата каде се разигрува за пласман во Суперлигата.
„Во првото коло од плеј-Оф фазата, нашиот тим ќе се соочи со екипата на КК Соколи – Штип, во меч кој носи огромно значење во борбата за место во елитата. Секој поен, секоја одбрана и секоја секунда ќе значат повеќе од било кога. Дојдете да бидете нашиот шести играч! Да ја наполниме салата, да создадеме атмосфера и заедно да го направиме првиот чекор кон целта“, велат од Охрид.
Натпреварот меѓу Охрид и Соколи се игра во недела во СРЦ „Билјанини Извори“ со почеток од 17 часот.
