Европската ракометна федерација ги објави делегираните судии за натпреварите од 12. коло во Лигата на шампионите, а еден од најзначајните дуели во групата Б им е доверен на нашиот судиски пар- Исмаил Металари и Ненад Николовски.
Македонската искусна судиска двојка ќе ја дели правдата на дерби пресметката меѓу ЧСМ Букурешт и Брест Бретањ, натпревар кој носи голема тежина во борбата за директен пласман меѓу најдобрите осум екипи во Европа.
Средбата ќе се одигра на 8 февруари од 16:00 часот во салата „Поливалента“ во Букурешт, каде домашниот тим ќе има шанса да ја намали бодовната разлика со лидерот во групата.
Брест Бретањ влегува во дуелот како првопласиран со 18 бодови, додека ЧСМ Букурешт со 14 бодови ја држи четвртата позиција. Победа за романскиот шампион би значела сериозен чекор кон првите две места кои обезбедуваат директен пласман во четвртфиналето.
