23-годишниот македонски фудбалер Иван Николов ќе ја продолжи својата кариера во Босна и Херцеговина, откако официјално стана нов член на Радник Бијелина.
Николов во новата средина пристигнува како слободен играч, по истекот на договорот со данскиот клуб Сондерјиске, каде што настапуваше во изминатиот период и стекна меѓународно искуство.
Фудбалерот кој игра на позицијата среден ред зад себе има богата клупска кариера, откако настапуваше за Брегалница, Вардар и Брера, а потоа направи интернационален чекор во Данска, каде беше дел и од Сондерјиске и Вендсисел.
Николов е добро познат и на репрезентативен план, бидејќи има 22 настапи за селекцијата на Македонија до 21 година, а зад своето име запиша и настап за сениорската А репрезентација.
Од Радник Бијелина очекуваат тој брзо да се вклопи и да донесе стабилност, енергија и квалитет во средниот ред, со што ќе биде значајно засилување во продолжението од сезоната.
