Општина Кочани, во соработка со Асоцијацијата на новинари од Кочани, го реализира традиционалниот избор на најуспешните спортисти и спортски работници за изминатата година.
Признанието Спортист на годината за 2025 му припадна на Даријан Павлев, член на Боречкиот клуб Спартак, кој со своите резултати ја обележа спортската година во градот. Второто место го освои Филип Стојанов од Карате клубот Партизан, додека третопласирана е каратистката Наталија Карова од Карате клубот Кочани.
Во категоријата Млади надежни спортисти, признание добија сите предложени кандидати, како потврда за перспективата и потенцијалот на младите таленти од Кочани.
За најдобра екипа е избрана ЖФК Кочани, додека признанието најдобар тренер му припадна на Игор Каров, тренер на Карате клубот Кочани. За најдобар спортски работник е избран Оливер Јовановски, за неговиот долгогодишен придонес во развојот на спортот.
Специјална постхумна награда ќе му биде доделена на Андреј Лазаров од Оризари, фудбалер, кој трагично го загуби животот минатата година во пожарот во дискотеката „Пулс“.
Свеченото доделување на признанијата во рамки на манифестацијата „Спортист на годината“ технички ќе го организира ОФС Кочани, а датумот и локацијата кога овој настан ќе се одржи ќе биде дополнително објавено.
