Македонскиот интернационалец Томе Китановски ја продолжува својата фудбалска кариера во Романија, откако потпиша договор со екипата на Мусцелул Кампулиунг. За 33-годишниот дефанзивец ова претставува уште еден странски ангажман во богата и разновидна кариера.
Китановски во новиот клуб пристигнува од Австрија, каде настапуваше за ФАВ АЦ, а претходно беше дел и од австрискиот ФК Мауерверк. Зад себе има сериозно меѓународно искуство, со настапи во повеќе европски шампионати.
Фудбалските почетоци ги направи во Пелистер, по што играше за неколку македонски клубови – Македонија ЃП, Струга Трим Лум, Шкупи и Воска Спорт. Во странство настапуваше за Университатеа Крајова во Романија, како и за српските Младост, Слобода Ужице и Вождовац. Во Хрватска го носеше дресот на Истра и Славен Белупо, во Албанија настапуваше за Кукеси, додека во Азербејџан беше дел од ФК Сабаил.
По новиот трансфер, Китановски ќе се обиде со своето искуство да даде значаен придонес во одбраната на романскиот тим.
