Ракометната репрезентација на Данска запиша огромна и многу значајна победа над Франција, славејќи со 32-29 во дербито од првото коло во главната фаза на Европското првенство, одиграно во Хернинг. За домаќинот ова беше меч „на сè или ништо“, поради тоа што Данците не пренесоа бодови од првата фаза и пораз речиси сигурно ќе значеше крај на сонот за полуфинале.
Дуелот започна во висок ритам и со многу физичка игра. Франција делуваше посигурно во воведот и во неколку наврати имаше минимална предност, но Данците брзо воспоставија рамнотежа и до паузата резултатот беше во целосен егал – 12-11 за „триколорите“.
Во второто полувреме сценариото не се промени – се играше гол за гол, со чести пресврти и без поголема резултатска разлика. Франција во еден момент поведе и со два гола, но Данска не дозволи противникот да се одлепи. Клучниот момент се случи во последните десет минути, кога избраниците на Николај Јакобсен ја подигнаа агресивноста во одбраната, а во нападот пронајдоа решенија преку Гидсел и Питлик.
Финишот целосно им припадна на Данците, кои со серија прецизни напади и неколку важни интервенции на голманот Емил Нилсен направија решавачка разлика и стигнаа до заслужен триумф од 32-29.
Матијас Гидсел беше прво име на натпреварот со девет погодоци, додека Симон Питлик додаде осум. Кај Франција најрасположен беше Емерик Мине со седум голови. По ова коло, Германија е лидер во групата со четири бода, додека Данска, Франција, Норвешка и Португалија имаат по два, а Шпанија останува без бодови.
