Македонските прволигаши продолжуваат со темпирање на формата на подготовките во Анталија, каде што одигруваат контролни натпревари со интернационални противници.
Екипата на Струга Трим Лум, одигра динамичен и резултатски богат дуел против словачкиот Тренчин, кој заврши без победник – 2:2. Стружани брзо наметнаа ритам и уште во раната фаза поведоа преку Марјан Радески, но во второто полувреме дозволија противникот да направи пресврт. И покрај тоа, македонскиот тим покажа карактер и со погодокот на Христијан Малески во финишот на мечот стигна до заслужено израмнување.
Кратовскиот Силекс, пак, го одигра својот контролен натпревар против узбекистанскиот Бунјодкор, но не успеа да избегне пораз. Средбата заврши со резултат 2:1 во корист на противникот, а единствениот гол за Силекс беше дело на Ади Алиќ.
Подготовките во Турција продолжуваат за неколку македонски екипи, меѓу кои се и Вардар, Тиквеш, Пелистер и Шкендија, кои преку вакви натпревари ќе ја коваат формата за продолжението на сезоната.
Утре битолскиот прволигаш Пелистер ќе одигра пријателски меч во Анталија против српскиот суперлигаш Спартак од Суботица.
Пролетниот дел од сезоната ќе започне на 7 февруари.
