Пелистер утре ќе одигра пријателски меч во Анталија во рамки на зимските подготовки, а битолскиот прволигаш за противник ќе го има суперлигашот Спартак Суботица од Србија.
На овој контролен натпревар шефот на стручниот штаб Милан Стојаноски шанса ќе им даде на сите фудбалери, а како што вели во Анталија имаат одлични услови за работа.
„Трет ден сме во Анталија, условите се одлични затоа и дојдовме тука. Работиме двапати дневно, утре имаме контролен натпревар со Суперлигашот Спартак Суботица од Србија. Што се однесува до нашата ситуација, фудбалерите се видно уморни, што е и цел за овој период. Утре сите ќе добијат шанса на натпреварот, ќе комбинираме и секој ќе има шанса, не е во прв план резултатот, секако дека секој натпревар треба да се одигра што подобро, секако дека треба да се внимава и на резултатот, но тоа не е во прв план. Важно е момците убаво да истрчат и да не дојде до некоја повреда, евидентно тешки им се нозете. Отприлика тоа што го баравме тоа успеавме и да го донесеме, не чекавме долго сега е скромен фудбалскиот пазарот во овој период, играчите се под договор. Тоа што ни се нудеше како можност, ние од тоа избравме неколку играчи на позициите каде имавме потреба. Јас се надевам дека момците ќе се вклопат, за сега добро работат и дека нивниот квалитет ќе ни помогне во остварување на нашите цели“, рече тренерот Милан Стојаноски пред утрешниот контролен меч на Пелистер против Спартак Суботица во Анталија.
Пелистер во пролетниот дел ќе цели кон директен опстанок во Прва лига.
