Филип Димоски брзо пронајде нова средина по разделбата со прилепска Победа и кариерата ќе ја продолжи во редовите на второлигашот Осогово од Кочани. 26-годишниот фудбалер во Осогово доаѓа во зимскиот преоден рок, со цел да му помогне на тимот во борбата за исполнување на сезонската цел.
Прилепчанецот одново ќе го облече дресот на Осогово, откако во неговиот прв престој во Кочани го носеше дресот на Осогово во период од август 2018 до јануари 2019 година.
Димоски зад себе има солидна есен во дресот на Победа, каде што беше еден од поважните фудбалери, а претходно значително придонесе и за директниот опстанок на прилепчани минатата сезона. Сепак, во текот на зимската пауза реши да побара нов предизвик и да ја прифати понудата од кочанскиот второлигаш, како што дознава Спортска Мрежа, а се очекува клубот да го промовира во следните денови.
Осогово во пролетниот дел ќе влезе од осмата позиција на табелата со освоени 23 бодови, а амбицијата на клубот е да се задржи во топ осум и на тој начин да обезбеди директен опстанок во Втората лига. Ангажманот на Димоски е дел од плановите на клубот да го зацврсти ростерот и да обезбеди поголема сигурност во продолжението од сезоната.
Низ својата кариера, новиот фудбалер на Осогово има настапувано за повеќе македонски клубови меѓу кои Детонит Плачковица, Охрид, Каменица Саса, Питу Гули, Вардар Неготино, Осогово, 11 Октомври, како и за Победа, од каде што и пристигнува во Кочани.
Со доаѓањето на Филип Димоски, Осогово добива проверено име и играч со искуство, од кого се очекува да има значајна улога во остварувањето на клупските амбиции во пролетниот дел од второлигашкиот шампионатот.
