Комесарката за натпреварување на Одбојкарската федерација на Македонија, Сања Никчевиќ, учествуваше на годишната завршна Конференција на проектот „Играј одбојка, расти со неа“, што се одржа во Букурешт, Романија, и со која официјално заврши двегодишниот циклус на имплементација на проектот.
Никчевиќ, која воедно беше и проект-менаџер на дводневната конференција, учествуваше заедно со уште 34 претставници од националните федерации што функционираат под капата на Европската одбојкарска конфедерација (ЦЕВ), институцијата која го спроведува овој значаен развоен проект.
На проект-менаџерите и координаторите им беше презентиран новиот едукативен материјал, кој ќе служи како прирачник и ќе биде распределен за употреба од новиот циклус што започнува во септември.
Една од централните теми на конференцијата беше заштитата на децата од училишна возраст вклучени во одбојката – препознавање на ризици, механизми за превенција и начини за делување во случаи на било каков облик на насилство.
Никчевиќ учествуваше и во повеќе работилници посветени на предизвиците при имплементација на проектот, ефективниот менаџмент, како и креирање идеи за негов понатамошен развој. Посебен акцент беше ставен на изготвување стратегии за привлекување повеќе момчиња во одбојката – предизвик со кој се соочуваат голем дел од федерациите вклучени во проектот.
Одбојкарската федерација на Македонија е партнер на ЦЕВ во проектот „Играј одбојка, расти со неа“ уште од 2018 година.
