Младите таленти на радовишки Детонит Плачковица од генерациите 2014 и 2015 имаа одлично претставување на силниот турнир „Football Winter Mini Cup 2025“, кој за првпат се одржа во Богданци, а кој Спортска Мрежа медиумски го поддржа.
Генерацијата 2014 одигра фантастичен турнир и го освои второто место, со биланс од пет победи, едно реми и еден пораз – токму во големото финале, каде несреќно загубија минимално со 2:0 од екипата на ФК Тони. Одличните партии на младиот Стефан Ристов не поминаа незабележано – тој беше прогласен за најдобар играч (МВП) на турнирот во генерација 2014 и дополнително ја освои наградата за најдобар стрелец.
Генерацијата 2015 исто така имаше солиден настап и заслужено го освои петтото место, прикажувајќи борбена игра и квалитет кој ветува за иднината.
Организацијата на „Football Winter Mini Cup 2025“ помина одлично, турнирот го собра најдоброто од младинските школи во регионот и претставува важна мотивација и поттик за следните генерации млади фудбалери.
Детонит Плачковица уште еднаш покажува дека работи квалитетно со младите категории и дека иднината на клубот е во сигурни раце.
