Како изгледа табелата во Втора лига пред комплетирањето на 15. коло?

Дури на 12 декември со натпреварот меѓу Детонит Плачковица и Скопје ќе се комплетира 15. коло на Втората македонска фудбалска лига, а со тоа ќе го имаме и конечниот изглед на табелата.

Многу извесно е дека Охрид ќе биде есенски шампион, ако го добие мечот со Слога во Виница тогаш „рибарите“ ќе избијат на врвот пред Шкендија Арачиново со 36 бодови, а пак моменталниот лидер ќе се спушти на втората позиција. Едно е сигурно, а тоа е дека Брегалница ќе биде трета на табелата со 33 бодови, без разлика на исходот од комплетирањето на 15. коло.

Виси четвртото место на Беласица, бидејќи ако Скопје го добие Детонит Плачковица во Радовиш, тогаш „пиратите“ од Автокоманда би биле четврти со 32 бодови, па затоа струмичани ќе се надеваат на пораз или реми на Скопје со радовишани.

Во долниот дел промени нема да има – сигурно е дека Големо Коњари, Слога Виница, Преспа и Победа ќе бидат во зоната за директно испаѓање и ќе ги очекува „пеколна“ борба за опстанок во Втората лига.