Фудбалскиот клуб Шкендија продолжува активно да се засилува во зимскиот преоден рок, а најново име во редовите на тетовскиот шампион е габонскиот напаѓач Фахд Нзенгуе. Клубот и официјално ја потврди соработката со 25-годишниот офанзивец, кој по успешно минатите лекарски прегледи стави потпис на договор со важност од две и пол години.
Нзенгуе во Шкендија пристигнува од редовите на Брера Струмица, каде што во есенскиот дел од сезоната се истакна како еден од најефикасните напаѓачи во Првата македонска фудбалска лига. На 16 натпревари постигна осум погодоци и додаде две асистенции, потврдувајќи ја одличната форма која ја најави уште во претходната сезона, кога за Брера реализираше шест гола на 14 средби.
Во својата кариера, Нзенгуе настапувал за Мунана во родниот Габон, а европскиот пат го започна во Словенија, каде беше дел од Табор Сежана и Приморје. По период без клуб, неговото доаѓање во Брера се покажа како вистински потег, што сега му донесе трансфер во еден од најголемите македонски клубови. Воедно, тој има и три настапи за сениорската репрезентација на Габон.
Од Шкендија истакнуваат дека Нзенгуе ќе биде дополнителна офанзивна опција во борбата за нови трофеи, а габонскиот напаѓач е второто засилување оваа зима, по претходното ангажирање на Дрилон Ислами од Клуж. Клубот му посака добредојде и многу успех во дресот на „црвено-црните“.
