АП Брера ќе го заврши првиот дел од Младинската Супер лига на првата позиција, откако денеска со убедливи 5:0 го совлада Арсими и си обезбеди четирибодна предност пред Работнички и Вардар. Стрелци на головите за стручничани беа Бојан Велков, Габриел Талески, Марио Митрев, а Иван Танчев двапати ја затресе противничката мрежа.
Работнички беше импресивен со 10:1 против Тетекс – хет-трик постигнаа Ердин Шабани и Дитмир Хоџа, додека Беркај Шаини даде два гола. По еднаш погодија Јован Коцески и Кренар Хоти, а за Тетекс единствениот погодок го постигна Феми Велија. Вардар триумфираше над Струга ТЛ со 3:2, со погодоци од Иво Марковски, Никола Ристевски и автогол на Елис Жута, додека за струѓани двата гола ги даде Јусуф Доко.
Македонија ЃП до важни три бода стигна со победата над Охрид Лихнидос од 1:0, преку Бесмир Исмани. Њу Старс со 2:1 го доби градското дерби против Шкупи. Во останатите средби, Шкендија ја декласираше Брегалница со 6:0, Пелистер славеше убедливи 5:1 против Скопје, додека Башкими како гостин го совлада Тиквеш со високи 6:0.
По 17 кола, АП Брера води со 40 бодови, пред Работнички и Вардар со по 36, додека Македонија ЃП е четврта со 31. Потоа следат Њу Старс (25), Шкупи (24) и Брегалница (22).
Во последното коло кое ќе го заокружи првиот дел од сезоната, АП Брера гостува кај Башкими, Работнички ќе се соочи со Скопје, Вардар гостува кај Арсими, Македонија ЃП патува во Штип на дуел со Брегалница, Њу Старс е домаќин на Тиквеш, а Охрид Лихнидос го пречекува Шкупи. На програмата се и градското дерби Тетекс – Шкендија и дуелот Струга Трим Лум – Пелистер, што гарантира возбудлива завршница на есенскиот дел.
