Управниот одбор на Фудбалската федерација на Македонија на денешната седница одлучи да не го продолжи договорот со селекторот на А репрезентацијата, Благоја Милевски, чиј мандат истече на 30 ноември 2025 година. Милевски беше дел од работата на најважните репрезентативни селекции уште од 2014 година.
Милевски ја предводеше македонската А селекција од 1 август 2021 година и во тој период одигра 48 натпревари, во кои запиша 18 победи, 14 ремија и 16 порази. Под негово водство, Македонија двапати избори бараж за Светско првенство, го освои првото место во Ц лигата од Лигата на нации и обезбеди настап во повисокиот ранг – Б дивизијата.
Од ФФМ упатија искрена благодарност до Милевски и неговиот стручен штаб за посветената работа, професионалниот пристап и остварените резултати. Федерацијата му посака успех во понатамошната тренерска кариера.
Одборот смета дека А репрезентацијата има потреба од „нова енергија“ и поинаков мотив за претстојните предизвици, со надеж дека новиот стручен тим ќе донесе дополнителна конкурентност и амбиции во настапите на националниот тим.
ФФМ потенцира дека останува целосно посветена на создавање најдобри услови за работа и максимална поддршка за репрезентацијата.
Најдоцна до 25 декември 2025 година ќе биде донесена одлуката за името на новиот селектор на Македонија.
