Утре се игра големото ракометно дерби од 14. коло на Суперлигата меѓу амбициозниот Охрид и непоразениот лидер Вардар во спортската сала „Билјанини Извори“.
Верните „рибари“ со силна мобилизација пред мечот, се организираат и бараат полна сала за силна поддршка на Охрид и „пеколна“ атмосферата за Вардар.
„Сабота сите на трибина, собир: Мини маркет, сабота (29. ноември) од 17 часот“, велат од НГ „Рибари“.
Алкалоид веќе „загуби глава“ во „пеколната“ охридска сала, сега Вардар доаѓа да ја почувствува таа атмосфера, а знаејќи колку Вардар се намачи на домашен терен против Охрид за двата бодови, сега „црвено-црните“ се максимално претпазливи за тоа свесни дека ги очекува тешко гостување.
Охрид е подготвен и сака да биде првиот тим кој ќе го „тресне“ Вардар, а пак двократниот европски шампион доаѓа да го „преплива“ Охридското Езеро и во Скопје да ги однесе бодовите.
Правда ќе делат браќата Методија и Михајло Илиевски како што веќе објави Спортска Мрежа, а делегати ќе бидат Марјан Начевски и Лери Мирчевски.
Дерби средбата меѓу Охрид и Вардар стартува во 19:30 часот.
