Фудбалскиот клуб Слога од радовишкото село Злеово донесе значајна одлука – домашниот терен, кој со години беше познат под името „Гробље“, од денес го носи новото, симболично име – стадион „Ване Трајанов“.
Со ова, клубот оддава почест на својот поранешен фудбалер Ване Трајанов, кој беше дел од Слогa, а кој за жал прерано го загубил животот. Во знак на благодарност и сеќавање, управата одлучила да го овековечи неговиот лик и придонес преку новото име на стадионот.
Мане Рујков од ФК Слога во изјава за Спортска Мрежа открива дека идејата за преименувањето постоела подолг период.
„Идејата ја имавме подолг период, но денес со меѓусебна консултација беше донесена одлука да се преименува во „Ване Трајанов“, изјави Рујков.
Покрај преименувањето, клубот најавува и инфраструктурни промени. Како што открива Рујков за Спортска Мрежа, во текот на зимската пауза е планирана реконструкција на игралиштето, со цел Слога пролетниот дел од Општинската лига Струмица да го дочека со подобрени услови за тренинг и натпревари.
По шест одиграни кола, Слога од Злеово се наоѓа на четвртото место на табелата со 10 освоени бодови. Во недела тимот го очекува и последниот натпревар од есенскиот дел – на домашен терен против составот на Единство од Пиперово.
