Ракометарите на Охрид се подготвуваат за еден од најтешките домашни натпревари оваа сезона- во сабота ќе го пречекаат непоразениот лидер Вардар, кој е во серија од тринаесет победи.
Но, исто така, и охриѓани се во добра серија, веќе имаат голема самодоверба и добра кохезија- од ден во ден, сè повеќе растат како тим.
Ова дерби ќе покаже колку домашниот тим е подготвен и мотивиран да се спротивстави на фаворитот. Едно е јасно- ќе биде возбудлив и неизвесен меч.
Еден од главните столбови на Охридската ракометна Тврдина- Шпанецот, Ориол Реј Моралес, на македонски јазик го најави дуелот и истакна дека со поддршка од трибините, тимот има реални шанси за позитивен резултат.
„Вардар е многу тежок тим да се победи. Сега се во добра форма, но и ние имаме добра динамика и не сме истата екипа како пред два месеци. Имаме појасен систем и поголема верба. Ако навивачите дојдат да нè бодрат, имаме големи шанси да победиме.“- изјави Моралес.
Дербито ќе се одигра во салата „Билјанини извори“ оваа сабота, со почеток во 19:30 часот.
Се очекува неизвесна и динамична средба, крај Езерото, каде Охрид ќе се обиде да ја искористи домашната предност и полната сала за да му се спротивстави на лидерот- Вардар.
