Македонскиот првак, Еурофарм Пелистер загуби на домашен терен од европскиот шампион Магдебург со 31-26, но битолчани покажаа дека можат да пружат отпор дури и на најсилните тимови.
Гостите започнаа со водство од 4-1, а Радивојевиќ и Хенигман успеаја да намалат на 4-3 по грешката на Магнусон. Пелистер имаше шанси да израмни, но европскиот првак веднаш казни за нова предност од три гола. И покрај моментите со двајца играчи помалку, Магдебург ја одржа предноста, која по 20 минути игра достигна пет гола, што го натера Гарабаја да побара тајм-аут.
Во продолжението, Пелистер намали на 15-12, а судиската контроверзна одлука за пенал, кој Брестовац успешно го одбрани, ги разбуди домашните навивачи. Митревски се истакна во второто полувреме со моќни интервенции, а капитенот Кузмановски, како и Ристевски и Хаџиќ, се вратија во игра, што донесе и моментален резултат од минус четири за Битолчани.
Сепак, Магдебург го контролираше мечот и го одработи рутински за победа, додека Пелистер не успеа да го запре Саугструп, кој постигна шест гола од шест обиди. Најдобри кај домашните беа Радивојевиќ и Манасков со по пет погодоци, додека Митревски забележа 11 интервенции.
Следниот предизвик за Еурофарм Пелистер е гостувањето кај хрватскиот шампион Загреб на 3 декември, натпревар кој може да биде клучен во борбата за осминафиналето, особено ако Загреб и ГОГ загубат во нивните натпревари против ПИК Сегед и Барселона.
