Македонскиот одбојкарски претставник Штип УГД ќе биде домаќин во Радовиш на првиот натпревар од 1/16 финалето на Челинџ купот, каде како противник ќе го има силниот италијански тим Милано.
Првиот меч е закажан за 10 декември (среда), со почеток од 19:00 часот, во спортската сала „25 Мај“ во Радовиш, каде Штип УГД ќе се обиде да обезбеди позитивен резултат пред тешкиот реванш во Италија.
Актуелниот носител на македонската куп-титула пред само една седмица со убедливи 3:0 и преку „златен сет“ го елиминираше норвешкиот Кол Ил, со што избори пласман во главната рунда од третото најквалитетно европско клупско натпреварување во организација на ЦЕВ.
Според распоредот на Европската одбојкарска конфедерација, првите двобои од оваа нокаут фаза се играат во периодот од 10 до 12 декември, додека реваншите се закажани веднаш по Нова година – од 5 до 7 јануари.
Реванш-натпреварот во Милано, Штип УГД ќе го одигра на 6 јануари, на Бадник, со почеток од 17:30 часот, во прочуената сала „Центро Павеси“.
Штип УГД ќе се надева дека домашната поддршка во Радовиш ќе биде клучна во битката за пласман меѓу најдобрите 16 екипи во Европа.
