Ракометарите на Охрид не оставија никакви дилеми околу победникот во реваншот против Слога Добој, триумфирајќи на гостински терен со убедливи 42-18 и зацврстувајќи го своето место во следната рунда на ЕХФ Европскиот Куп. Македонскиот тим повторно ја покажа својата сила, фокусот и дисциплината, држејќи го темпото во текот на целиот меч. Овој успех е историски за клубот и ја потврдува европската репутација на охриѓани.
Тренерот на Охрид, Борис Ројевиќ, во изјава за Спортска Мрежа, го истакна професионалниот пристап на своите играчи. Тој нагласи дека, и покрај големата предност од првиот натпревар, тимот одиграл максимално концентрирано и квалитетно.
,,Им честитам на моите момци, бидејќи и покрај големата предност од првиот натпревар, одиграа многу сериозно и квалитетно. Пристапија кон натпреварот максимално професионално, го испочитуваа договорот и покажаа дека знаат да го држат ритамот и фокусот цели 60 минути.“
Исто така, Ројевиќ го истакна и одличниот тимски дух и хемијата меѓу играчите, нагласувајќи дека тие се видливи особено на тренинзи и натпревари, каде тимот функционира како едно.
,,Хемијата во тимот е на највисоко ниво. Ова е група играчи кои меѓусебно се поддржуваат, се туркаат напред и секој ден растат како екипа. Тоа се гледа и на тренинг, и на натпревар – тимот „дише“ како едно.“- изјави Ројевиќ.
Со оваа победа, Охрид покажа дека е многу повеќе од тим – тоа е заедница, енергија и срце што „дише“ како едно. Со ваква решителност, страст и мотив, охриѓани се подготвени да ја остават својата трага на европската сцена!
