Вардар стигна до убедлива победа од 34-24 против младинскиот состав на Еурофарм Пелистер 2, благодарение на искуството и посилната клупа. Мечот се одигра порано, за „црвено-црните“ да се подготват за натпреварот од Лига Европа против Сесвете.
Младите битолчани успеаја да го држат Вардар во неизвесност околу 20 минути, но потоа скопјани полека ги презедоа работите во свои раце. И покрај отсуството на тројцата главни стрелци, Малус, Борозан и Горига, како и неколку други стандарди кои останаа на трибините, Вардар ја презеде контролата во второто полувреме. Предводен од голманот Васил Гогов, кој забележа 14 одбрани, тимот постепено ја зголемуваше предноста и ја потврди победата.
Марио Стојановски и Марек Марчинијак постигнаа по 6 гола, додека Харуки Кавада и Мигел Пинто се истакнаа со по 5 погодоци. Кај гостите, Бојан Гичев беше најпрецизен со 6 гола, но младите пелистерци не успеаја да го задржат темпото на „црвено-црните“.
