Единствениот македонски женски претставник во одбојка кој остана активен во европските клупски купови сезонава, шампионот Јанта Волеј Кисела Вода, по завршувањето на настапите во квалификациите за Лигата на шампионите, ќе ја продолжи европската авантура во ЦЕВ Купот.
Девојките на тренерот Никола Јаневиќ во 1/16 финалето ќе се соочи со хрватската Младост Загреб, еден од најпознатите и најискусни клубови во регионот.
Првиот натпревар Јанта Волеј КВ ќе го одигра на домашен терен, на 26 ноември од 20:00 часот во СЦ „Јане Сандански“ во Скопје. Реваншот е закажан за 3 декември (20:00 часот) во спортската сала „Дом на одбојката Бојан Страниќ“ во Загреб.
Победникот од овој двомеч ќе обезбеди пласман во осминафиналето на ЦЕВ Купот и ќе продолжи со настапи во Европа, каде ќе се сретне со подобриот од двомечот меѓу полската Моја Радомка и чешкиот Оломук.
