ФК Беласица ги известува до сите љубители на фудбалот во Струмица дека во петок, пред натпреварот со Новаци, ќе се одржи мала свеченост во чест на играчите кои влегуваат во ТОП 10 по број на настапи за клубот од неговото формирање до денес.
Овојпат, клубот ќе му оддаде посебна почит на легендарниот стопер Костадин (Дине) Секулов, кој се наоѓа на четвртото место на вечната листа со вкупно 337 првенствени настапи и импресивни 33 голови – рекорд за одбранбен играч во историјата на Беласица.
Во петок, пред почетокот на натпреварот, претседателот на клубот Славчо Васков – Пинда ќе му врачи плакетa и врамен дрес со неговото име и бројот на настапи, како дел од проектот за одбележување на фудбалските великаните кои го носеле клубот низ децениите.
Кариера за респект
- Дебитира за Беласица есента 1974 година, на само 16 години, против Брегалница Штип.
- Првиот гол го постигнува истата есен, против Борец Велес.
- Помеѓу 1983–1987 е еден од најдобрите стрелци на тимот во Втората југословенска лига – Исток, со 17 голови.
- Во сезоната 1983/84, со 7 гола, е најдобар стрелец заедно со Пане Блажевски.
- Капитен на Беласица во периодот 1984–1988.
- Во шампионската сезона 1987/88 придонесува со уште 7 гола.
- Последниот натпревар го одигрува против ОФК Кикинда во пролетта 1989 година, во Прва Б Југословенска лига.
- Во 11 сезони одигрува најмалку 25 првенствени натпревари – доказ за неговата константност и посветеност.
Многумина го сметаат Костадин Секулов за еден од најдобрите центархалфови во историјата на клубот, пример за дисциплина, борбеност и верност кон сино-белиот дрес.
Апел до навивачите
ФК Беласица ги повикува сите свои поддржувачи да дојдат и да му оддадат чест на великанот Дине Секулов – фудбалер кој остави неизбришлива трага во историјата на струмичкиот фудбал.
