Екипата на Железарец ја продолжува својата победничка форма и има четири од четири во новата сезона од Втората футсал лига, ланскиот прволигаш сака експресен кам-бек во елитата, а во рамки на 4. коло го доби Конзули од Битола, кој како домаќин играше во Ресен со 1:3.
Мартин Калчев беше двоен стрелец, а еден гол постигна Роберт Илиев, а пак Мирко Богески си постигна автогол.
Кратово го декласираше Карадаку со убедливи 13:4 во спортската сала во Пробиштип, победа најавена уште во првиот дел со 8:1.
Димитар Стојановски имаше пет гола, толку постигна и Горан Арсовски, додека пак по еден гол постигнаа Бобан Начковски, Михаил Спасовски и Никола Стојчевски.
За гостинот стрелци беа Шуајб Шукрија, Омер Саќипи, Јакупи Емини и Саљи Салии.
Убедлива победа однесе и Каршиака, која пак дома го декласираше Партизан Југ со 8:1.
Куршити и Садики постигнаа по два гола, а по еден гол Емини, Ќани, Ибраими и Јакупи, за гостинот Апостоловски беше единствен стрелец.
ССК Скопје на домашен терен немаше сили за позитивен резултат откако загуби од СЕЕ Университи со убедливи 2:6.
Домаќинот прв го отвори резултатот, но затоа гостинот ја наполни брзо мрежата. Здравевски и Димковски беа стрелци за ССК Скопје, а пак за тетовскиот тим Хисен Мемеди постигна четири гола, а Гезим Азизи два.
Во Свети Николе немаше победник, двата поранешни прволигаши ги поделија бодови откако одиграа 1:1. Гостинот од Кавадарци преку Никола Димов по четири минути го отвори резултатот, а Стефан Трендафиловски во 28. ми постави конечните 1:1.
Железарец е на врвот од табелата со 12 бодови, Црна Река е втора со осум бодови, а пак Кратово е трет со седум бодови, на дното е Карадаку без бодови.
