Македонската репрезентација се подготвува за вториот квалификациски предизвик во циклусот за Евробаскет 2027, а атмосферата по победата над Данска е позитивна – но и натаму концентрирана кон задачите што следат. Веќе вечерва од 18:00 часот во СРЦ „Кале“ гостува селекцијата на Грција, фаворитот во групата „Ф“.
Искусното крило Ивана Кметовска имаше значајна улога во триумфот над Данска, особено во дуелите под кошот заедно со Мерит Хемпе и Матеа Николиќ. Таа истакнува дека успешниот почеток не треба да го намали фокусот, бидејќи пред тимот има уште многу работа.
„Првата цел ја остваривме, но не застануваме тука. Пред нас имаме уште пет натпревари во кои сакаме да реализираме уште некоја победа“ – вели една од најискусните во нашата селекција.
Македонија веќе ја анализира играта на Грција, репрезентација која загуби од Хрватска и сигурно ќе настапи дополнително мотивирана во Скопје.
„Имаме кратко време за некои подетални анализи. Сепак, се запознавме со нивната игра која ја прикажаа на средбата со Хрватска, која ја загубија пред својата публика. Значи ќе бидат уште помотивирани на вечерашниот меч. Не менуваме ништо во пристапот, знаеме колку можеме. Ќе се обидеме да одиграме уште поцврсто, особено во одбраната, затоа што против нас ќе имаме доста искусни кошаркарки како Спаноу и Фасула, кои заедно со Кристинаки се носителите на играта на противничката селекција“ – смета Кметовска.
Мечот се игра вечерва во „Кале“, со почеток во 18:00 часот, со директен пренос на МРТ3. Влезот за публиката е слободен.
