Ракометарите на Охрид утре ќе го одиграат првиот натпревар од третото коло во ЕХФ Европскиот куп на домашен терен против МРК Слога Добој од Босна и Херцеговина. Средбата ќе се игра во салата „Билјанини Извори“ со почеток во 18 часот, додека реваншот е закажан за 22 Ноември во Добој.
Ракометарот на ГРК Охрид, Тилен Стрмљан, најави дека тимот целосно е подготвен за предизвикот и ги повика навивачите да ги бодрат како досега.
„Станува збор за добра екипа и треба добро да се подготвиме. Сите знаеме кои се нашите планови оваа сезона за Европа. Ќе се обидеме на првиот натпревар да постигнеме што подобар резултат и да се пласираме во следното коло. Ќе биде тежок натпревар. Би ги повикал навивачите да дојдат во што поголем број да ни помогнат како и досега и заедно да славиме за пласман во следниот круг,“ изјави Стрмљан.
Со оглед на формата и желбата за пласман во следното коло, Охрид ќе се обиде да го искористи домашниот терен и поддршката од навивачите за позитивен резултат пред реваншот во Добој.
