Ракометната еуфорија во Охрид не стивнува. По маестралната победа над Алкалоид (28:24) на домашен терен, навивачите се подготвени за нова доза адреналин – двомечот со Слога Добој во Европскиот ЕХФ Куп го буди градот. Тимот од Охрид оди со самодоверба, обединет и полн со енергија, а секој тренинг и секој потег на теренот ја зацврстува верата дека оваа сезона може да биде историска. Поддршката од трибините и борбениот дух на играчите создаваат атмосфера која инспирира и мотивира – идеална за мини-интервју со стратегот Борис Ројевиќ.
Борис Ројевиќ, српскиот стратег со искуство во националната репрезентација и клубови како РК Војводина, ја презеде клупата на ГРК Охрид со јасна цел – амбициозна и стабилна игра на теренот. Победата над Алкалоид со 28:24 покажа дека екипата се движи во вистинската насока, а вниманието сега се префрла кон двомечот со Слога Добој во Европскиот ЕХФ Куп.
Спортска Мрежа разговараше со стратегот на Охрид во пресрет на новиот европски предизвик против тимот од Босна и Херцеговина.
- Колку сте задоволен од досегашната прикажана игра на вашите момци, како во Супер лигата, така и во ЕХФ Купот, со оглед на тоа дека сте нова екипа и ви беше потребно време за да се воиграте?
– Навистина сум многу задоволен од пристапот на играчите, и на тренинзите и на натпреварите. Секогаш се на максимум. Иако од самиот почеток ги загубивме Јотиќ и Веин, кои беа стартери и важен дел од тимот, момците покажаа карактер и продолжија во ист ритам. Екипата расте од натпревар до натпревар и тоа особено ме радува.
- Какви се Вашите очекувања за двомечот со Слога Добој од Европскиот ЕХФ Куп?
– Моите очекувања секогаш се исти – одиме на победа и пласман понатаму. Ја почитуваме Слога Добој, но верувам во мојот тим и во нашиот квалитет.
- Каква атмосфера владее во соблекувалната пред овие два нови предизвици од Ехф Купот, особено сега- после маестралната победа над Алкалоид во Супер Лигата?
– Атмосферата во соблекувалната е одлична. Владее заедништво, голема енергија и задоволство по победата над Алкалоид. Таа победа ни донесе дополнителен импулс, но остануваме фокусирани на претстојните предизвици.
- Што сметате дека ќе биде клучно за да ги добиете тие два меча- офанзивата, дефанзивата, или пак, тимскиот дух и домашниот терен?
– За нас одбраната секогаш е клучот. Кога сме цврсти и компактни во дефанзива, сè друго доаѓа многу полесно. Се разбира, важни се и тимскиот дух и домашниот терен, но темелот е добрата одбрана.
- Што би им порачале на навивачите на Охрид пред мечот со Слога Добој во недела?
– Ги повикувам нашите навивачи да дојдат во што поголем број и да ги поддржат момците. Тие со својот труд и залагање апсолутно го заслужија тоа, а нивната поддршка секогаш ни е дополнителна сила.
Со Ројевиќ на чело, Охрид гради нова ера – стабилна игра, борбен дух и силна поддршка од трибините. Победата над Алкалоид ја покажа решителноста на тимот, а следниот чекор е двомечот со Слога Добој, каде секој фактор – од одбраната до тимскиот дух – ќе биде пресуден.
