Утре во салата „Млаз“ во Богданци се игра едно од најголемите дербија сезонава во Првата ракометна лига, каде непоразениот лидер Младост ќе го пречека директниот конкурент Драчево Јуниор – дуел меѓу два тима со јасна цел: пласман во Суперлигата.
Пикерот на Драчево Јуниор, Александар Стојменов, за Спортска Мрежа истакнува дека неговиот тим во дербито влегува максимално подготвен и со силна желба за победа.
„Атмосферата во соблекувалната е одлична. Тимот е мотивиран, фокусиран и сите знаеме колку ни значи ова дерби. Трениравме добро цела недела, ги анализиравме деталите и сме подготвени да дадеме максимум. Влегуваме со голема желба и со јасен план што треба да направиме на теренот“, вели Стојменов за Спортска Мрежа.
Салата во Богданци се очекува да биде исполнета до последното место, но Стојменов уверува дека тоа нема да биде пречка за неговиот тим.
„Знаеме дека атмосферата ќе биде жешка, но такви натпревари се најубавите за играње. Публиката може да создаде притисок, но ние сме фокусирани на нашата игра и на договореното. Наместо да ни пречи, ќе ја искористиме таа енергија како дополнителен мотив да одиграме уште подобро“, нагласува пикерот на Драчево Јуниор во изјава за Спортска Мрежа.
Драчево Јуниор ќе се обиде да стане првиот тим што ќе го сопре победничкиот низ на Младост, додека домаќините, пред полни трибини, ќе целат кон продолжување на својата перфектна сезона. Сè е подготвено за дерби кое ветува висок интензитет, голема борба и ракометна атмосфера за паметење.
