Лидерот Шкендија Арачиново потешко од очекуваното славеше на „Цвај арената“ каде во самиот финиш од мечот преку пресврт го доби Вардар Неготино со резултат од 1:2.
Најзаслужни за големиот пресврт се искусните Дарио Десниќ и Љупчо Трпески кои во финишот од мечот погодија кога најмногу беше потребно – триумф и нови три бодови за тимот од Арачиново, кој останува и натаму единствениот непоразен второлигаш.
Домаќинот преку Мартин Младеновиќ во 70. минута го отвори резултатот за водство од 1:0 и имаше предност само девет минути, кога Дарио Десниќ погоди за 1:1.
Во самиот финиш од мечот кога сите мислеа дека бодовите ќе се поделат, Љупчо Трпески погоди во 95. минута за „смрзнување“ на домашните навивачи – неговиот гол ги донесе трите бодови на контото на Шкендија Арачиново, а тоа предизвика ерупција на делот од трибината каде беа навивачите на лидерот во Втората лига.
