Ракометната федерација на Македонија ја започна продажбата на билети за пријателскиот натпревар меѓу нашата репрезентација и Јапонија, кој ќе се одигра на 1 ноември во Куманово.
Љубителите на ракометот ќе можат да уживаат во настапот на избраниците на селекторот Кирил Лазаров по симболична цена од само 100 денари. Очекувањата се дека реновираната спортска сала во Куманово ќе биде исполнета до последното место.
Билетите се достапни преку онлајн платформата МК Тикетс, а натпреварот ќе биде вистинско спортско уживање за локалната публика. Пред овој дуел, двете репрезентации ќе одиграат уште еден контролен меч зад затворени врати во Скопје на 30 октомври.
Пријателскиот дуел Македонија – Јапонија ќе започне во 16:00 часот, а ќе биде одлична можност селекцијата на Лазаров да ја тестира формата пред претстојните квалификациски предизвици.
