Фудбалскиот клуб Овче Поле од Свети Николе одбележува извонреден јубилеј – 100 години постоење, век исполнет со историја, традиција и страст кон најпопуларниот спорт. Основан далечната 1925 година, клубот низ децениите израсна во симбол на градот и во гордост за сите генерации што го чувствуваат фудбалот како дел од својот живот.
Овој јубилеј не е само бројка, туку приказна за луѓето што го граделе клубот со љубов и посветеност, за фудбалерите што со срце играле за дресот, и за навивачите кои секогаш стоеле зад тимот – и во радост и во тешки мигови.
Во текот на изминатиот век, ФК Овче Поле минал низ многу фази – од славни моменти и успеси, до падови и нови почетоци. Но едно никогаш не се променило – љубовта кон фудбалот и гордоста да се биде дел од Овче Поле.
Денес, клубот гледа и нанапред – со јасна визија да се изгради модерен и стабилен клуб, кој ќе им овозможи на младите таленти да се развиваат, да учат фер-плеј, тимска работа и посветеност.
„Овче Поле отсекогаш било повеќе од клуб. Тоа е дел од животот на градот, место каде што се создаваат пријателства, каде што се учи борбеност и чесност,“ истакнуваат од клубот.
Со посебна свеченост, Свети Николе го слави овој голем јубилеј со гордост и емоции, со почит кон сите што оставиле трага во клубот, но и со верба во иднината што претстои.
Токму на овој голем јубилеј, екипата на Овче Поле го совлада Рудар со убедливи 3:0, во меч од 8. коло на Трета лига – Исток, а сите три погодоци ги постигна Тоше Манов, за што веќе објави Спортска Мрежа.
