Македонската фудбалска репрезентација до 17 години испиша ново златно поглавје во младинскиот фудбал, обезбедувајќи пласман во Елитната фаза од квалификациите за Европското првенство – прв пат по 2017 година.
Турнирот кој се одигра во Струмица под организација на Фудбалската федерација на Македонија (ФФМ) донесе возбудливи натпревари и силна конкуренција. Македонија во групата со Чешка, Унгарија и Гибралтар покажа дисциплинирана и зрела игра, предводена од селекторот Влатко Колев, и со тоа заслужено обезбеди место меѓу најдобрите европски селекции.
„Остваривме навистина одличен резултат. Во мошне тешка група успеавме да го избориме пласманот во елитните квалификации, а притоа во ниту еден момент не делувавме инфериорно ниту против Чешка, а уште помалку против Унгарија. Во третиот натпревар, кога бркавме и гол-разлика, момците покажаа карактер и верба. Ова е голем мотив за сите нас, но не застануваме тука. Ќе се подготвиме максимално добро за мартовските натпревари со најсилните селекции и можам да ветам дека ќе се бориме до последниот меч“, вели Влатко Колев – селектор на Македонија до 17 години.
Пласманот на оваа генерација во елитната фаза е јасен показател за новиот систем и пристап на работа во младинскиот фудбал. Промените што ги спроведува ФФМ во организацијата, стручниот кадар и развојните програми создаваат стабилна основа за континуитет и напредок.
Овој резултат не е само спортски успех, туку и потврда дека македонскиот младински фудбал оди во вистинска насока – со јасна визија, професионализам и верба во младите таленти.
