Одново многу погодоци во Трета лига – Север, а денес беа одиграни натпреварите од вонредното 7. коло.
Дербито меѓу Аеродром и Еуромилк ГЛ заврши без победник, двете екипи одиграа ефикасен меч со конечен резултат 2:2.
Поранешниот прволигаш од Горно Лисиче резултатот го отвори преку Томче Павловски во 6. минута од белата точка, а пак Мартин Ацески во 12. минута погоди за 1:1. Пред крајот на првиот дел Оливер Пеев во 43. минута погоди за 1:2 на полувреме, со гол од пенал. Во вториот дел Иван Пашариковски ги постави конечните 2:2.
Во 52. минута тренерот на Аеродром, Ивица Аврамовиќ доби директен црвен картон, а пак Леонид Стојановски во 77. минута заработи втор жолт картон и ја остави својата екипа со играч помалку на теренот, но тоа не го искористи гостинот. Одличен меч имаше и младиот Ангел Настевски.
Фортуна преку Исмаили и Бериша го доби дуелот со Беса од Сарај со 2:0, а пак Лопати се израдува на прв сезонски триумф славејќи над Беса од Слупчане со 2:0, а благодарение на погодоците на Бајрами и Хасан.
Кадино одново загуби овој пат од Студеничани со 2:3. По само три минути игра Шабани и Алиу погодија за 0:2, а во 18. минута Марио Благојевски намали на 1:2 со гол од белата точка. Во вториот дел Далибор Костовски си постигна автогол, а пак потоа истиот играч во 82. минута погоди но овој пат во вистинската мрежа за конечни 2:3.
Пчиња ја продолжува одличната форма и со убедливи 1:6 славеше над дебитантот Отља на гостински терен во Слупчане. Николче Стојановски беше двоен стрелец, а по еден гол имаа Христијан Стојчевски, Бобан Стојановски, Јованчо Цаневски и Далибор Тодоровски. За домаќинот единствен стрелец во 86. минута беше Љиридон Реџепи.
Куманово продолжува во победничката форма, овој пат славеше над Башкими Љуботен со 2:3, а благодарение на Гезим Бакиевски кој постигна хет-трик. За домаќинот во вториот дел стрелаа Фетаи и Чупи.
БВК Коњаре во финишот се спаси од пораз откако Демири погоди во 94. минута за конечни 2:2 и со тоа ги поделија бодовите со Ржаничино. За гостинот уште стрелаше и Чалафи, а пак за домаќинот погодија Мицевски и Мирков.
Во однос на табелата Еуромилк ГЛ и Куманово го делат врвот со по 19 бодови, трет е БВК Коњаре со 17 бодови, а пак Пчиња е четврта со 16 бодови.
