Превалец во моќно издание го декласираше Росоман во дербито на колото, а на кое всушност немаше ниту „Д“ од дерби, откако домаќинот со 6:1 беше убедлив на свој терен и пред својата публика.
Росоман го доживеа својот прв сезонски пораз и тоа од директниот конкурент за првото место.
Росоман прв поведе преку Бојан Миланов во 7. минута од мечот, а потоа домаќинот на полувреме стигна до 2:1, а во вториот дел моќно го доби противникот.
За Превалец двоен стрелец беше Јосиф Манасиев, а по еден гол постигнаа Александар Јордановски, Давид Спиридонов, Кристијан Маневски и Александар Крстевски.
Мечот меѓу Башкими од Јаболчиште и Тополка заврши без победник, но и без погодоци (0:0) за делба на бодовите.
Млекар никако да стигне до прва сезонска радост, откако загуби од Венец со 1:2, па така трите бодови одат во Долни Дисан. За домаќинот стрелец беше Зоран Котески, а пак за гостинот двоен стрелец беше Петар Ристовски.
Ланскиот второлигаш Борец со 2:5 го доби дербито со Ултрас, па така трите бодови одат во Велес. За победникот двапати погоди Илхан Имеров, а по еден гол постигнаа Дејан Стефановски, Теодор Мирчевски и Марко Јанковски, а пак за домаќинот во финишот погодоција Бобан Тошески и Христи Мицевски.
Дреново немаше сили за изненадување и загуби со 0:3 од екипата на Влазними Јуниор, а мечот беше решен во финишот, откако резултатот го отвори Хабијл Ибраими, а пак Мелван Усеиноски беше двоен стрелец.
Трите бодови останаа во Крушево откако екипата на Питу Гули со 2:1 го доби Бучин. Гоце Стојаноски во 24. минута го отвори резултатот за водство на домаќинот, кој пак во вториот дел во 58. минута преку Ѓорѓи Стрезовски ја дуплираше предноста, а конечните 2:1 ги постави Ѓорѓија Мургоски во 80. минута.
