Денес, ГРК Охрид, и официјално доби големо засилување на голманската позиција, откако хрватскиот репрезентативец Кристијан Пилиповиќ потпиша договор со клубот до крајот на тековната сезона. Станува збор за 30-годишен чувар на мрежата со богато меѓународно искуство, кој во Охрид пристигнува по осум сезони поминати во редовите на швајцарскиот Кадетен Шафхаузен.
Пилиповиќ, висок 192 сантиметри, во својата кариера настапувал и за Висла Плок од Полска, Нексе од Хрватска и Фиверс од Австрија. Има одиграно официјални натпревари и за сениорската репрезентација на Австрија, а од 2022 година е дел од хрватската национална селекција.
„Барав еден амбициозен проект, да пробам нешто ново, сакав да работам со амбициозни и фанатични луѓе и тоа го препознав во Охрид. Луѓето овде се навистина луди за ракомет, сакаат нешто да направат, нешто да создадат, навистина ова е една многу убава приказна. Бев воодушевен од градот и пристапот на клубот и добрите разговори со спортскиот директор и тренерот, така што одлуката ја направив лесно и верувам во добри резултати и добра иднина,“ изјави Пилиповиќ.
Со овој потег, охридскиот суперлигаш добива искусен и проверен голман кој ќе донесе дополнителна сигурност меѓу стативите и стабилност во одбраната. Ангажманот на Пилиповиќ е уште еден доказ дека ГРК Охрид сериозно ги гради своите амбиции за висок пласман и нови успеси во сезоната.
