Македонската тенисерка Лина Ѓорческа продолжува со одличните настапи на турнирите од ВТА серијата. На турнирот во Роверето, Италија (со награден фонд од 115.000 долари), Ѓорческа во првото коло запиша голема победа против домашната претставничка и четврта носителка, Нуриа Бранкачо.
Нашата најдобра тенисерка славеше со 2-0 во сетови (6-4, 6-3) по 76 минути игра, обезбедувајќи место во второто коло на овој престижен турнир.
Бранкачо, која моментално се наоѓа на 151. позиција на ВТА листата – што е нејзин најдобар пласман во кариерата – не успеа да ја запре сигурната и агресивна игра на Ѓорческа.
Во првиот сет, Лина прва направи брејк и поведе со 4:2, но Италијанката веднаш возврати. Сепак, во десетиот гем Ѓорческа повторно направи брејк и го затвори сетот со 6:4.
Во вториот сет нашата тенисерка доминираше со два брејка и поведе со 5:1, по што Бранкачо успеа само да намали, пред Лина сигурно да го заврши мечот со 6:3.
Со овој триумф Ѓорческа обезбеди пласман во второто коло, каде во среда ќе се сретне со Алиона Болсова Задоинов од Шпанија, која ја совлада својата сонародничка Ангела Фита Болуда со 2-0 во сетови.
