Големото дерби од 8. коло во Втората македонска фудбалска лига меѓу Брегалница и Скопје ќе се одигра под рефлектори на Градскиот стадион во Штип, што ќе биде прв официјален натпревар на рефлекторите по подолг временски период.
Овој потег на клубот и градот Штип носи нова енергија и фудбалска привлечност во источниот дел на Македонија, а дуелот ветува вистинско уживање за љубителите на фудбалот.
Брегалница влегува во дербито како лидер на табелата со 17 бодови, колку што има и второпласираната Шкендија Арачиново, но штипјани имаат подобра гол-разлика (17:4). Од друга страна, Скопје е на четвртото место со 14 бодови и најдобар напад во лигата — дури 21 постигнат гол во досегашниот тек од сезоната.
Во досегашниот дел од првенството:
-
Брегалница има скор од 5 победи, 2 ремија и без пораз,
-
Скопје бележи 4 победи, 2 ремија и 1 пораз.
Дербито во Штип ќе биде судир на два тима со јасна цел – враќање во Првата лига. Победата ќе значи многу за двете страни: Брегалница со триумф ќе остане лидер, додека Скопје со евентуални три бода ќе се приклучи во трката на самиот врв.
Историјата покажува дека овие два клуба имаат долга и интересна ривалска линија – од 2010 година досега одиграле 12 меѓусебни натпревари, со дури шест ремија, што потврдува колку традиционално се тешки и израмнети нивните дуели. Последниот меч во март годинава заврши 1-1.
Фудбалот се враќа под рефлектори во Штип, а Брегалница ќе имаат можност пред својата публика, да бара три бодови со цел да го потврди првото место. Ова ќе биде дуел на Влатко Костов и Александар Таневски.
